هنا شقلبان أحمد فؤاد نجم

هنا شقلبان
محطة اذاعة حلاوة زمان
من القاهرة ومن كردفان
وسائر بلاد العرب واليابان
ومن فنزويلا أيضا ايران
ومن اي دار
أو بلد مستباحة
بفعل السياحة مع الأمريكان
********
هنا شقلبان
محطة اذاعة حلاوة زمان
نقدم اليكم بكل اللغات
مراسح وسيما وجميع الفنون
صحافة ومنابر وتلفزيونات
وخطبا ف جوامع وجبنة وزيتون
ونقزح ونركب جميع الموجات
ونبحث ونفهم في كل الشئون
ودايما نلعلع في كل الحالات
ولا حد سامع ولا يحزنون
وتسمع ما تسمع دا مايهمناش
لأن احنا اصلا بناكل بلاش
فخليك في نفسك وماتخليناش
نسلّط عليك القلم واللسان
********
هنا شقلبان
محطة اذاعة حلاوة زمان
يسر الاذاعة ولا يسركوش
بهذي المناسبة ولا بندعيكوش
نقدم اليكم شحاته المعسل
وبدون الرتوش
شبندر سماسرة بلاد العمار
معمر جراسن للعب القمار
وخارب مزارع و تاجر خضار
وعقبال أملتك أمير الجيوش
ما تقدرش تنكر
تقول مااعرفوش
ما تقدرش ايضا تفول ماأسمعوش
********
شحاتة المعسل حبيب القلوب
يزيل البقع والهموم والكروب
يأنفس يأفين يبلبع حبوب
ويفضل يهلفط ولا تفهموش
وتفهم ما تفهم دا ما يهمناش
لأن انت فاهم وعامل طناش
ح تنكر وتحلف ح اقول لك بلاش
ح تتعب دماغنا وتتعب كمان
********
هنا شقلبان
محطة اذاعة حلاوة زمان
لأن المخبي ظهر واستبان
وكل المسائل بدت للعيان
وطلعت حكاوي ونزلت كمان
عن التهريبة وعن كيت وكان
وعن محوبيه وعن أُلعبان
ظهر فى المدينة كأن الطوفان
وغرّق مراكب وسوّح غيطان
وبعض المراكب ح تغرق كمان
وأزمة مساكن وأزمة أمان
وعالم بياكل في عالم جعان
وريحة مؤامرة فى جو المكان
مخطط خيانة مع الأمريكان
لدبح العشيرة وحرق المكان
وفيه ناس بترغي ولازم بيان
كما ابلغونا جميع الودان
لهذا وذاكا وتلكم كمان
نقدم اليكم عروسة وحصان
شحاته المعسل وهذا البيان
********
هنا شقلبان
محطة اذاعة حلاوة زمان
بسم الله
سلام عليكم وسلمون وموز
وأما المسائل فهنجف ولوز
فيا اخوتي ويا أخوات
اليكم بياني كما هو آت
جميع المسائل تمام التمام
وكل الكلام دا مجرد كلام
فصبرا جميلا ولا تقلقوش
وشغل الضغاين أنا ماأقبلوش
ما فيش أي حاجة
عليّ الطلاق والعتاق بالتلاتة
ما فيه اي حاجة
وقدّر كمان ان فيه أي حاجة
ما لوش أي لازمة الكلام واللجاجة
وعيب ان عيّل يسوق السماجة
ويعملّي باللو ويعمل ديباجة
********
آنا بطبعي ضد السماسرة الكبار
بحكم المنافسة وحكم الجوار
لكن مش في طبعي
انى أعمل فضيحة
لواحد زميلي هبش كام صفيحة
ما كل الزمايل بتهبش صفايح
وكل اللي جاي مش زي اللى رايح
فيا ايها الشعب صَهْيِن تفلعص
مساء التنفس مساء الروايح
********
أخويا الامير بزرميط الايراني
بعت لي السنة دي
عزمني ودعاني وأنا قبلت طبعا
ورحنا العزومة وكانت وليمة
ما تحصلش تاني
دا إيه المحمر
وإيه المكمر وايه المشمر
وايه الصواني
وانا دماغي تعبت ولفت صراحة
من الفخفخة والهنا الاصفهاني
هناك يعني مثلا اذا شربت طافية
تمز بكوارع وبسطرمة ضاني
********
ما شفتش هناك
ناس بتحقد عليهم
ولا ناس بتشتم فلان الفلاني
لأنه اشترى عزبتين من شطارتة
وحكمة ادارته وطلّع مباني
وبعد الوليمة استلمنا الهدايا
مفضض ومدهب وقز وقيشاني
وطبعا أخويا الأمير قال لي حاجة
ح اقولهالكو طبعا اذا الوقت ناسب
ح يطلعلي عيّل بدون اي حاجة
ويعملّي فلحس ويقعد يحاسب
دا حقد اشتراكي أنا ماأقبلوش
ولو هو ابني أنا مااعتقوش
********
كلام عن سماسرة كلام عن دعارة
حاجات مش صحيحة جمل مستعارة
وعايزين يخلّوا البلد اردغانة
وعايزني اسيب البلد من زمان
وأنا مش ح اسلم واسيب الأمان
ولا بالبوليس والنيابه كمان
فيا ايها الشعب كمّل جميلك
وصبرا واذلم حتيجي المصاري
وتاكل وتشرب تبع مايآتيلك
وتغرق فى بحر العبيد والجواري
وترسم حياتك حسب مايرائيلك
ونملا الحواري فساقي وقصاري
تسبح بحمدك وتشكر جميلك
وفضل الزبالة وطفح المجاري
********
ختاما سلاما وآخر كلاماً
ضروراً
يسود الهدوء والوئام فماذا والاّ
ح طربقها ولاّ اهرب فلوسي
واسافر قواماً سلام عليكم
وسلمون وموز بصفتي رئيساً
وأباً وجوز
********
- أحمـد فؤاد نجـم -

ايه يا عم الكلام ده كله
على العموم هى جاامده يا مان
شكراااااااااااااااااااااااااا

يابنى انا قولت ان انتا جا مد What a Face

والله يابني انا بحب احمد فؤاد نجم
بس بصراحه بخاف منه
اصل كلامه مش بيريح حبايبنا وبصراحه
انا مقفولي موقع قبل كده بسببه وياريت ناخد بالنا من قصايده
ونراجعها كويس قبل النشر
وشكرا

هنا شقلبان أحمد فؤاد نجم 0d7b7eb42f